काठमाडौँ – सरकारले विभिन्न सञ्चारमाध्यमका कार्यालय र नेपाली कांग्रेसका सभापति गगनकुमार थापाको निवास अगाडि शङ्कास्पद रूपमा गाडी पार्किङ गराउने व्यक्तिलाई संरक्षण दिएको आरोप लागेको छ। यद्यपि सरकारले भने घटनामा आफ्नो कुनै संलग्नता नरहेको दाबी गरेको छ। घटनासँग सम्बन्धित गाडीका धनी वा चालकको नाम भने सार्वजनिक गरिएको छैन। गोप्य राखिएको छ।
प्रहरीका अनुसार घटनास्थलमा पार्किङ गरिएका सवारीका चालकहरूको खोजतलास गर्दा उनीहरू फेला नपरेपछि सवारी आवागमन सुचारु गराउन क्रेनको सहायताले ती सवारी हटाई उपत्यका ट्राफिक प्रहरी कार्यालय बग्गीखानामा लगिएको थियो। त्यसपछि सवारी यातायात व्यवस्था ऐनअनुसार कारबाही प्रक्रिया अघि बढाइएको काठमाडौँ उपत्यका प्रहरी कार्यालयका सूचना अधिकारी प्रहरी नायव महानिरीक्षक गोविन्द थपलियाले निकालेको विज्ञप्तिमा उल्लेख छ।
उनले सवारी यातायात व्यवस्था ऐन, २०४९ को दफा १६४ उपदफा (१) (ख) अन्तर्गत कानुनबमोजिम कारबाही गरिएको जानकारी दिएका छन्। तर, कारबाहीमा परेका सवारीका धनी वा चालकको परिचय भने सार्वजनिक गरिएको छैन।
प्रहरीले सत्यतथ्य नबुझी सुरक्षा निकायको नाम जोडेर सामग्री सम्प्रेषण गर्दा आमनागरिकमा भ्रम सिर्जना हुन सक्ने भन्दै कपोलकल्पित समाचार सम्प्रेषण नगर्न सञ्चारमाध्यमलाई आग्रह गरेको छ।
प्रहरीले उल्लेख गरेको सवारी यातायात व्यवस्था ऐन, २०४९ को दफा १६४ उपदफा (१)(ख) अनुसार सवारी अड्याउन निषेध गरिएको स्थान वा समयमा सवारी अड्याउने व्यक्तिलाई पहिलो पटक पाँच सय रुपैयाँ, दोस्रो पटक एक हजार रुपैयाँ र तेस्रो पटक वा सोभन्दा बढी पटक एक हजार पाँच सय रुपैयाँसम्म जरिवाना गर्ने व्यवस्था छ। यस्तो जरिवाना यातायात निरीक्षक वा कम्तीमा सहायक प्रहरी निरीक्षक दर्जासम्मका अधिकृतले तत्काल गर्न सक्ने कानुनी व्यवस्था छ।